काठमाडौं । राष्ट्रपति डा. रामवरण यादवले राष्ट्रिय एकताका निम्ति सबै जातजातिको पहिचान आवश्यक रहेको बताएका छन् ।

'किरात येले संवत्' लाई राष्ट्रिय संवत् घोषणा गर्नुपर्ने मागसहितको ज्ञापनपत्र बुझ्ने क्रममा आइतबार राष्ट्रपति डा. यादवले यस्तो धारणा व्यक्त गरेका हुन् । उनले देश सबैको साझा भएको भन्दै जाति, भाषा, संस्कृति, धार्मिक विविधतामा एकता खोज्नुपर्ने बताए । सबै जातिको अस्तित्व बचाउँदै वैज्ञानिक ढंगले राज्यको पुनःसंरचना गर्नुपर्ने उनको भनाइ थियो ।

वैरागी काइँलाको नेतृत्वमा गएको टोलीले राष्ट्रपतिलाई ज्ञापनपत्र बुझाएको थियो । राष्ट्रपतिले मागका विषयमा संविधानसभाको ध्यानाकर्षण गराउने आश्वासन दिएको काइँलाले जानकारी गराए । टोलीमा किरात येले संवत् अध्ययन समन्वय समिति, किरात समन्यव समिति, किरात सुनुवार सेवा समाज, किरात याक्खा छुम्मा, किरात याक्थुङ चुम्लुङ र किरात राई यायोक्खाका प्रतिनिधि संलग्न थिए । पहिलो किरात राजा यलम्बर हाङको स्मृतिमा 'किरात येले संवत्' समुदायमा प्रचलनमा छ । यो संवत् अहिले ५०७० मा अघि बढिरहेको छ ।