काठमाडौं । प्रधानमन्त्री माधव नेपालले 'किरात येले संवत्' सरकारले लागू गर्न सक्ने बताएका छन् । किरात येले संवत् अध्ययन समन्वय समितिलगायतका संस्थाले यो संवतलाई राष्ट्रिय मान्यता दिनुपर्ने मागसहित बिहीबार सिंहदरबारस्थित प्रधानमन्त्रीको कार्यालयमा ज्ञापनपत्र बुझाएका थिए । ज्ञापनपत्र बुझेपछि प्रधानमन्त्री नेपालले यो संवत् लागू गर्न सकिने आश्वासन दिएका हुन् । उनले बहुजाति, बहुसंस्कृति, बहुधर्म हाम्रो मुलुकको पहिचान भएको भन्दै प्रमाण तथा दस्तावेजका आधारमा प्रक्रिया पुर्‍याएर किरात येले संवतलाई राष्ट्रिय मान्यता दिन सरकार तयार रहेको बताए ।

प्रधानमन्त्रीलाई ज्ञापनपत्र बुझाउने कार्यक्रममा समितिका संयोजक वैरागी काइँलाको नेतृत्वमा किरात याक्खा छुम्मा, सुनुवार सेवा समाज, याक्थुङ चुम्लुङ र किरात राई यायोक्खा, सभासद्हरू, पूर्वराजदूतलगायत सहभागी थिए । किरात समुदायमा माघ १ गतेबाट नयाँ वर्ष लाग्ने मान्यता छ । शुक्रबारदेखि किरात येले संवत् ५०७० सुरु हुनेछ । राज्य पुनःसंरचनाका क्रममा यो संवतलाई राष्ट्रिय मान्यता दिलाउन संयोजक काइँलाले प्रधानमन्त्रीको ध्यानाकर्षण गराएका थिए ।

किरातीहरूको येले संवत माघ १ गतेदेखि सुरु हुने गरेको छ । किरातीहरूले माघे संक्रान्तिका दिनलाई नयाँ वर्षका रूपमा मनाउँदै आएका छन् । किरातीहरूले पहिलो किराती राजा यलम्बरले चलनचल्तीमा ल्याएको तिथिमितिलाई नयाँ संवतका रूपमा मनाउने गरेका छन् । यलम्बरले गोपालवंशी राजा भुवनसिंहलाई पराजित गरी शासन सुरु गरेको इतिहास छ । यलम्बरसहित नेपालमा २९ पुस्ताले शासन गरेका थिए । यले संवत् ५०७० साल लागे पनि यसबारे आधिकारिक तथ्य भने फेला पर्न सकेको छैन । यसबारे खोज तथा अनुसन्धान जरुरी रहेको विज्ञहरूको भनाइ छ । यले संवतलाई किरातीहरूले आआफ्नै तरिकाले मनाउँदै आएका छन् ।